បញ្ហារវាងការខិតខំធ្វើការ និង ភាពឆ្លាតវៃលើការងារ (Hard Work or Smart Work) ជាទូទៅគេសង្កេតឃើញថា មានជម្រើសតែមួយប៉ុណ្ណោះគឺថា គួរជ្រើសរើសការខិតខំប្រឹងប្រែងធ្វើការងារ ឬ ក៏ភាពឆ្លាតវៃលើការងារ។ ចុះហេតុអ្វីបានជាយើងមិនអាចធ្វើវាបានក្នុងពេលតែមួយឲ្យមានប្រសិទ្ធភាពទៅ?
ភាពឆ្លាតវៃលើការងារ គឺជាផ្នែកមួយដ៏សំខាន់នៃបរិបទការងារនៅយុគសម័យបច្ចេកវិទ្យានេះ។ គ្មានសហគ្រិនណាម្នាក់ ឬ នាយកប្រតិបត្តិក្រុមហ៊ុនណាមួយអាចនិយាយប្រាប់អ្នកពីកម្រិតអតិបរមានៃភាពឆ្លាតវៃរបស់ខ្លួននោះឡើយក្នុងការងារប្រចាំថ្ងៃរបស់ខ្លួន។
យ៉ាងណាមិញ ដើម្បីឈានទៅដល់ចំណុចកំពូលមួយក្នុងជំនាញរបស់អ្នក អ្នកមិនមែនត្រឹមតែទាញផលប្រយោជន៍ចេញពីបច្ចេកវិទ្យា និង ត្រូវធ្វើការឲ្យមានប្រសិទ្ធភាពប៉ុណ្ណោះទេ តែអ្នកត្រូវធ្វើជាមនុស្សដំបូងនៅក្នុងការិយាល័យ និង យ៉ាងហោចណាស់ជាបុគ្គលម្នាក់ដែលក្រោកពីព្រឹកព្រលឹម ខណៈដែលគូប្រជែងរបស់អ្នកកំពុងតែគេងលង់លក់ស្រួល។
នាយកប្រតិបត្តិក្រុមហ៊ុនកំពូលជាច្រើនត្រូវបានគេរកឃើញថា គិតជាមធ្យមបានក្រោកពីគេងនៅម៉ោង ៦:១៥ នាទីព្រឹក ខណៈដែលនាយកប្រតិបត្តិក្រុមហ៊ុនជាច្រើនទៀតបានក្រោកនៅម៉ោង៥ ព្រឹក និង យ៉ាងហោចណាស់បានធ្វើការ២ ម៉ោងក្រោយពេលទទួលទានអាហារពេលល្ងាច។ ក្នុងមួយថ្ងៃៗបុគ្គលទាំងនេះបានធ្វើការរហូតដល់ ១៨ ម៉ោង ហើយជាលទ្ធផលភាគច្រើន ពួកគេទទួលបានជោគជ័យតាមបំណងប្រាថ្នារបស់ខ្លួន ខណៈដែលមនុស្សដទៃទៀតបរាជ័យ។
ដូចអ្វីដែលលោក Seth Priebatsch អ្នកបង្កើតហ្គេម SCVNGR បានលើកឡើងដូច្នេះថា៖« ខ្ញុំបានចំណាយពេលយ៉ាងច្រើនម៉ោងក្នុងមួយថ្ងៃនៅក្រៅការិយាល័យធ្វើការរបស់ខ្ញុំ។ ខ្ញុំបានសម្ភាសន៍មនុស្សជាច្រើននៅថ្ងៃចុងសបា្តហ៍ ពេលយប់ និង ព្រឹកព្រលឹម។ ខ្ញុំគិតថា ខ្ញុំមានដុង (ពូកែ) ខាងការងារសង្គម ដូច្នេះខ្ញុំក៏ជ្រើសរើសយកការងារហ្នឹងទៅ!»។
តាមពិតទៅបុគ្គលដែលមានភាពឆ្លាតវៃក្នុងការងារ នឹងទទួលបានមកវិញនូវការសន្សំពេលវេលាបានច្រើនជាងមុន និង អាចឆាប់បានដល់គោលដៅប្រកបដោយប្រសិទ្ធភាពជាងអ្នកដែលមិនសូវមានភាពវៃឆ្លាត។
ទោះបីជាបែបនេះក្តី ប្រសិនបើអ្នកចង់ជោគជ័យ អ្នកមិនគួរផ្ដោតតែទៅលើភាពឆ្លាតវៃក្នុងការធ្វើការប៉ុណ្ណោះទេ។ បុគ្គលជោគជ័យភាគច្រើនជាមនុស្សមានភាពវៃឆ្លាត ប៉ុន្តែសម្រាប់អ្នកគួរតែខិតខំប្រឹងប្រែងធ្វើការផងដែរ។ ការខិតខំប្រឹងប្រែង ឬ ការព្យាយាមដោយមិនបោះបង់អាចធានាបាននូវភាពជោគជ័យដល់គោលដៅ ហើយបើអ្នកមានតែភាពវៃឆ្លាត តែគ្មានការខិតខំប្រឹងប្រែង លទ្ធផលនឹងអាចផ្ទុយពីអ្វីដែលអ្នករំពឹងទុក។
ប៉ុន្តែជាគោលការណ៍ ការខិតខំធ្វើការ និង ភាពឆ្លាតវៃក្នុងការធ្វើការ វាមិនគ្រប់គ្រាន់នោះឡើយក្នុងការងារប្រចាំថ្ងៃរបស់អ្នក ជាពិសេសលើកិច្ចការអាជីវកម្ម។ ទេពកោសល្យ ទស្សនវិស័យ ហានិភ័យ លាភសំណាង និង កត្តាផ្សេងៗទៀត គឺសុទ្ធតែរួមចំណែកធ្វើឲ្យអ្នកជោគជ័យ។
អ្នកត្រូវចាំថា ចង់ក្លាយជាមនុស្សដែលមានសក្ដានុពលលើការងារ អ្នកត្រូវតែខិតខំធ្វើការ មានភាពឆ្លាតវៃឲ្យខ្លាំងបន្តិច ធ្វើការបានយូរអង្វែង និង ចេះអភិវឌ្ឍខ្លួនជាលំដាប់ បើមិនដូច្នេះទេ អ្នកពិតជាមិនអាចដើរទាន់បុគ្គលជោគជ័យផ្សេងៗទៀតនោះឡើយ៕
សូមអរគុណ៖ Thebnews
ប្រភព៖ Entrepreneurs-journey.com
Post a Comment
Post a Comment