ប្រសិនបើអ្នកស្ដាប់មួយភ្លែត ហាក់ដូចជាភាសានេះ អាក្រក់បន្តិច និងអសីលធម៌ទៀតផង។ ប៉ុន្តែ ជាការពិតសង្គ្រាមនៅលើទីផ្សារនាបច្ចុប្បន្ន គឺចៀសមិនផុតនោះទេការស្ទូចយកអតិថិជនពីគ្នាទៅវិញទៅមក សំខាន់កុំឲ្យតែប្រើវិធីស្មោកគ្រោកដែលចាត់ទុកថាជាអំពើអាក្រក់តែប៉ុណ្ណោះ។
ពិតណាស់ដែលថា ប្រសិនបើអតិថិជន ធ្លាប់តែជាម៉ូយចាស់របស់អ្នកផ្សេង ស្រាប់តែនៅសុខៗរត់មករកក្រុមហ៊ុនរបស់អ្នក អ្នកប្រាកដជាមិននិយាយជាដាច់ខាតថា ពួកគេត្រូវតែរក្សាភក្ដីភាពសម្រាប់គូប្រកួតរបស់អ្នក។ ពិតជាអីចឹងមែនទេ? អ្នកសប្បាយនៅពេលដណ្ដើមម៉ូយពីគូប្រកួត ហើយគូប្រកួតអ្នកក៏សប្បាយ នឹងស្ទូចអតិថិជនពីអ្នកវិញដែរ។ ក្នុងរបររកស៊ី គឺវាអីចឹង។ មែនទេ?
ប្រសិនបើលោកអ្នកកំពុងរកវិធីអូសទាញយកអតិថិជន តើគួរធ្វើតាមវិធីណាខ្លះ? ខាងក្រោមនេះគឺជាគន្លះសំខាន់ៗដែលអ្នកគួរពិចារណា។
១) រក្សាទំនាក់ទំនងកុំឲ្យដាច់
«ការអង្គុយនិយាយគ្នា ការនិយាយខ្សឹបខ្សៀវពីមាត់មួយទៅមាត់មួយ» ត្រូវបានជាគេចាត់ទុកថា «ឮតាមខ្យល់បក់» ព្រោះអ្វីដែលឮគេថា ពុំសុទ្ធតែពិតទាំងអស់ទេ ប៉ុន្តែក្នុងការប្រកបរបររកស៊ី លោកអ្នកត្រូវប្រមូលព័ត៌មានឱ្យបានគ្រប់ជ្រុងជ្រោយ។ អ្នកគួរ ស្ដាប់គេនិយាយអ្វី ក៏ស្ដាប់សិនទៅដើម្បីប្រមូលព័ត៌មាន ស្ដាប់គេនិយាយច្រើន អ្នកនឹងទទួលបានព័ត៌មានច្រើន អាចជាការរិះគន់ដើម្បីស្ថាបនា អាចព័ត៌មានពីគូប្រកួតរបស់អ្នក។ ស្ដាប់ត្រង់ចំណុចនេះ គឺមានន័យថា អ្នកត្រូវស្ដាប់អតិថិជន មិនមែនអតិថិជនអ្នក ឬ អតិថិជនគូប្រកួត។ ត្រូវចុះជាប់ជាប្រចាំ តាមដានព័ត៌មានដំណឹងអំពីមុខរបររបស់លោកអ្នក ឧស្សាហ៍ប្រាស្រ័យទាក់ទងជាមួយមិត្តភក្តិរកស៊ីជាមួយគ្នា។
ធ្វើដូចនេះបាន ចំណេះដឹងផ្សេងៗមូលមកលើដៃអ្នក លោកអ្នកដឹងសព្វតាំងពីមនុស្សគ្រាក់ៗដែលចេញពីកន្លែងចាស់ និងបំណងរបស់គេ គេចង់ទៅណាទៀត? អតិថិជនមិនពេញចិត្តនឹងអ្នកទៅនឹងរឿងអ្វី? ផលិតផលគុណភាពអន់? ការផ្គាប់ចិត្តអតិថិជនអត់? ចំណង់ចំណូលចិត្តអតិថិជនមានការប្រែប្រួល? ទាំងអស់នេះគឺសុទ្ធតែជាព័ត៌មានសារសំខាន់សម្រាប់អ្នក។
២) ពិនិត្យមើលប្រវត្តិរូបគូប្រកួតអ្នកនៅលើបណ្ដាញសង្គម
ប្រសិនបើលោកអ្នកស្គាល់មនុស្សដែលជាស្នូលនៅក្នុងក្រុមហ៊ុនគូប្រកួតរបស់អ្នក សូមបើកមើលប្រវត្តិរូបរបស់គេនៅក្នុងបណ្ដាញសង្គម facebook ឬ LinkedIn ។ ធ្វើដូចនេះ លោកអ្នកអាចដឹងអំពីព័ត៌មានខ្លះៗអំពីអតិថិជនរបស់គេ ឬវិធីទាក់ទងជាមួយអតិថិជនគេ ឬពិធីផ្សេងៗ ក្នុងមុខរបររបស់គេដែលមានប្រយោជន៍សម្រាប់អ្នក។ ចូរលោកអ្នករកវិធីទាក់ទងជាមួយអ្នកទាំងនោះ ប្រសិនបើអ្នកសង្កេតឃើញថាមនុស្សសំខាន់ៗមួយចំនួនដែលកំពុងធ្វើការទាក់ទងជាមួយអតិថិជន ឬមានបណ្ដាញមាំជាមួយអតិថិជន។ អ្នកអាចទាញបុគ្គលទាំងនោះឱ្យមកធ្វើការជាមួយអ្នក ធ្វើអីចឹងអ្នកនឹងអាចវាយលុកទីផ្សារគូប្រកួតបានលឿន។
៣) យុទ្ធសាស្ត្រប្រើបណ្ដាញសង្គម
អ្នកគួរបើកទំព័រ Facebook របស់គូប្រកួត ហើយរកមើលកន្លែងផ្ដល់មតិផ្សេងៗ និងការចែករំលែកផ្សេងៗដែលបង្ហោះតាមបណ្តេញសង្គមមួយនេះ ថាតើមាននរណាខ្លះបញ្ចេញមតិ ឬចែករំលែកព័ត៌មានអំពីផលិតផល ឬអ្វីដែលថ្មីដែលក្រុមហ៊ុនគូប្រកួតទើបចេញ? តាមដានអតិថិជនដែលមានសកម្មភាពនៅលើបណ្ដាញសង្គមគូប្រកួត នោះនៅពេលណាមួយគេនឹង Follow facebook's page របស់អ្នកវិញ។
បណ្ដាញសង្គមមានច្រើន ដូចជា LinkIn , Twitter, Facebook ប៉ុន្តែ នៅស្រុកខ្មែរ គេនិយមប្រើ Facebook ជាងគេ។ នៅត្រង់ចំណុចនេះអ្នកគួររៀបយុទ្ធសាស្ត្របណ្ដាញសង្គមរបស់អ្នកឱ្យបានមាំទាំជាងគូប្រកួត និងជាពិសេសត្រូវបង្ហាញតម្លៃ និងលក្ខណៈពិសេសលើសគូប្រកួតរបស់អ្នកទៅកាន់មនុស្សទាំងនោះ។
៤) ត្រូវឆ្លាតបន្តិច
អ្នកអាចលក់ទំនិញចុះថ្លៃចំពោះអ្នកដែលយកក្រដាស ឬ ខិត្តប័ណ្ណផ្សាយពាណិជ្ជកម្មតាមសារព័ត៌មានរបស់គូប្រកួត។ អ្នកអាចសាកល្បងក្រោយពេលគូប្រកួតបិទទ្វារហាង ហើយ លោកអ្នកសាកបន្តលក់ទៀតលមើល។ រកវិធីច្បាមយកទីផ្សារ តាមអ៊ីនធឺណិតពោលគឺបង្កើនការផ្សព្វផ្សាយ ឲ្យដល់ដៃអតិថិជនដែលជាមុខសញ្ញារបស់លោកអ្នក ឬអតិថិជនគោលដៅ ក្រោយពេលគេចេញពីគេហទំព័ររបស់គូប្រកួត។
៥) ធ្វើឲ្យអតិថិជនដៃគូប្រកួតក្លាយជា VIP របស់អ្នក
ពាក្យថា មិនស៊ីជោរទេ តែបើបង្អាប់ខឹង ក៏មិនខុសអីនៅក្នុងភាសាជំនួញនោះដែរ។ អ្នកចង់ឲ្យអាជីវកម្មរបស់អ្នកមានឧត្តមភាព តែអតិថិជន ឬ មនុស្សជាច្រើនទៀតកំពុងធ្វើអាជីវកម្មជាមួយដៃគូប្រជែងរបស់អ្នកក៏ត្រូវការឧត្តមភាពដូចអ្នកដែរ។ ដូច្នេះ ការបង្កើនទំនាក់ទំនងកាន់តែជិតស្និទ្ធជាមួយបុគ្គលទាំងនោះ នឹងធ្វើឲ្យអ្នកមានទឹកមាត់លេបកាន់តែច្រើន។ អ្នកអាចចំណាយពេលវេលាមួយចំនួនដូចជាអញ្ជើញបុគ្គលទាំងនោះទៅទទួលទានអាហារថ្ងៃត្រង់ ធ្វើឲ្យដូចជា VIP របស់អ្នក។ នេះហើយជាឱកាសដ៏ល្អ ព្រោះថា ដៃគូប្រជែងរបស់អ្នកប្រហែលជាមិនធ្លាប់បានធ្វើអញ្ចឹងពីមុនមកផងក៏មិនដឹង?
៦) អ្នកត្រូវឈរនៅជ្រុងម្ខាងនៃដៃគូប្រជែង
ដូចម្តេចទៅហៅថា អាជីវកម្មជោគជ័យ? ចម្លើយនោះមិនពិបាកឆ្លើយនោះទេ ពោលគឺអាជីវកម្មណាដែលទទួលបានការគាំទ្រច្រើនពីអតិថិជន នោះហើយជាអាជីវកម្មដែលជោគជ័យ។ ចុះបើអាជីវកម្មរបស់អ្នកមិនដែលធ្លាប់ភ្លក់រសជាតិជោគជ័យ ខណៈដែលអាជីវកម្មដៃគូរបស់អ្នកកំពុងមានសក្ដានុពលនៅក្នុងទីផ្សារ នោះមិនកាន់តែវីវរធំទេឬយ៉ាងម៉េច? ដូច្នេះហើយជាអ្វីដែលអ្នកត្រូវសិក្សាស្វែងយល់ឲ្យបានច្បាស់ក្នុងបង្កើតអត្តសញ្ញាណពិសេសមួយសម្រាប់អាជីវកម្មរបស់អ្នក។ ភាសាសមញ្ញាគឺ« យើងឲ្យតម្លៃលើអតិថិជន» ឬ « យើងប្ដេជ្ញាចិត្តបង្កើតគុណភាពមួយឲ្យល្អដាច់គេ» អាចជាយុទ្ធសាស្ត្រវាយលុកទីផ្សារយ៉ាងមានប្រសិទ្ធភាព។ ការធ្វើឲ្យអតិថិជនដឹងថា ផលិតផលឬ សេវាកម្មរបស់អ្នកខុសគ្នាដាច់ស្រលះពីដៃគូប្រជែងរបស់អ្នក នោះហើយបញ្ជាក់ថា ពួកគេកំពុងចាប់ផ្តើមលង់ស្នេហ៍មកលើអ្នកហើយ។
៧) ចំណាយប្រាក់ទិញទឹកចិត្តអតិថិជនរបស់ដៃគូប្រជែង
គ្មានឡើយនៅក្នុងវិស័យអាជីវកម្មដែលអ្នកគិតថា អាចជោគជ័យដោយមិនចំណាយលុយកាក់។ ការអន្ទងចិត្តអតិថិជនដៃគូប្រជែងរបស់អ្នកក៏ដូច្នេះដែរ។ តើអ្នកត្រូវផ្តល់ឲ្យអតិថិជនក្នុងកម្រិតណាដើម្បីឲ្យពួកគេស្ម័គ្រចិត្តទទួលយកផលិតផល ឬ សេវាកម្មរបស់អ្នក? ជាឧទាហរណ៍ ក្រុមហ៊ុន T-Mobile បានផ្តល់ឲ្យអតិថិជនដោយឥតគិតថ្លៃ(Free)ឬ បញ្ចុះតម្លៃ ( Discount ) ចំពោះអ្នកណាដែលបានមកដល់មុនគេ។ នេះហើយជាយុទ្ធសាស្ត្រចំណាយប្រាក់ដ៏មានប្រសិទ្ធភាពមួយក្នុងចំណោមយុទ្ធសាស្ត្រទីផ្សារផ្សេងៗទៀត ដែលអាចឆក់យកអតិថិជនភ្លាមៗ ដើម្បីប្រយោជន៍ក្រុមហ៊ុនក្នុងរយៈពេលវែង។
៨) សម្លឹងមើលគោលដៅរយៈពេលវែង
អ្នកចំណាយប្រាក់ ដើម្បីបានចំណូលមកវិញ មិនថាអញ្ចឹង? ការចំណាយលុយទាក់ទាញអតិថិជនថ្មីដែលកំពុងធ្វើអាជីវកម្មជាមួយដៃគូប្រជែងរបស់អ្នក គឺរឿងដែលអ្នកត្រូវធ្វើឡើង បើទោះបីជាអតិថិជនទាំងនោះមិនមែនសុទ្ធតែជ្រើសរើសយកអ្នកទាំងអស់ក៏ដោយ។ តែអ្នកត្រូវចាំថា អតិថិជនដែលទទួលស្គាល់ផលិតផល ឬសេវាកម្មរបស់អ្នកនៅពេលនេះ នឹងមានឥទ្ធិពលនៅលើទីផ្សារអាចជួយជ្រោមជ្រែងឲ្យអ្នកនាំប្រាក់ចំណូលមកវិញ នឹងកាន់តែច្រើនឡើងៗនៅពេលអនាគត។ ដូច្នេះ អ្នកកុំចំណាយប្រាក់សម្រាប់គោលដៅថ្ងៃស្អែក តែដើម្បី៥ ឆ្នាំ ១០ ឆ្នាំ ឬ ២០ឆ្នាំខាងមុខ៕
Post a Comment
Post a Comment